VITA YA USAJILI: Arsenal na Man City Vitani Kugombea Sahihi ya Sandro Tonali wa Newcastle

Arsenal Yaanza Mipango ya Kuboresha Kikosi

Baada ya msimu mzuri ulioshuhudia Arsenal wakitwaa taji lao la kwanza la Ligi Kuu ya Uingereza (EPL) baada ya miaka 22 chini ya kocha Mikel Arteta, miamba hao wa London Kaskazini sasa wamegeuzia nguvu zao kwenye soko la usajili.

Licha ya machungu ya kupoteza fainali ya Ligi ya Mabingwa Ulaya dhidi ya Paris Saint-Germain (PSG) kwa mikwaju ya penalti 4-3 hivi karibuni, Arsenal imeingiza kiasi kikubwa cha fedha kinachowapa jeuri ya kusajili wachezaji wenye hadhi ya juu msimu huu wa joto.

Mtaalamu wa usajili duniani, Fabrizio Romano, amefichua kuwa Arsenal inatarajiwa kufanya angalau usajili wa wachezaji watatu, huku winga, kiungo, na beki wa kulia wakiwa vipaumbele vyao vikubwa.

City Wamgeukia Tonali Kama ‘Plan B’

Wakati huohuo, mabingwa wa zamani Manchester City nao wapo sokoni kusaka kiungo mpya. David Ornstein wa mtandao wa The Athletic alithibitisha hivi karibuni kuwa City walituma ofa ya kumnunua kiungo wa Nottingham Forest, Elliot Anderson, lakini ofa hiyo ilikataliwa mara moja huku Forest wakihitaji zaidi ya pauni milioni 100 ili kumwachia nyota huyo.

Kutokana na ugumu huo, Sandro Tonali wa Newcastle sasa ameibuka kama chaguo mbadala (Plan B) la nguvu kwa upande wa Pep Guardiola iwapo dili la Anderson litashindikana. Hata hivyo, watakabiliana na upinzani mkali kutoka kwa Arsenal ambao nao wanamtaka mchezaji huyo wa kimataifa wa Italia.

Kupitia ukurasa wake wa X, Fabrizio Romano aliandika:

“Manchester City wanaendelea na mazungumzo kwa ajili ya Elliot Anderson baada ya ofa ya kwanza kukataliwa lakini Forest wanataka zaidi ya milioni 100. Inaeleweka kuwa Sandro Tonali anatazamwa kama mbadala thabiti kwa Man City iwapo dili la Anderson halitakamilika. Arsenal nao pia wanavutiwa na Tonali.”

Je, Tonali Anahitajika Arsenal? Nacho Monreal Achambua

Beki wa zamani wa Arsenal, Nacho Monreal, ametoa mtazamo wake kuhusu uwezekano wa usajili huu, akieleza kuwa kuwasili kwa Tonali kunaweza kuifanya Arsenal kuwa na safu bora zaidi ya kiungo duniani, ingawa kuna changamoto ya nafasi kutokana na uwepo wa Declan Rice na Martin Zubimendi.

Monreal alisema:

“Kama Arsenal watamsajili Tonali, ni wazi watakuwa na safu bora zaidi ya viungo duniani. Lakini walimsajili Zubimendi mwaka jana kwa pesa nyingi, kwa hiyo hili ni jambo gumu. Kuwa na Tonali, Zubimendi, na Rice kwa pamoja ni mzigo mkubwa, hivyo naona watasubiri kumuuza mmoja kati ya Zubimendi au Rice ikiwa kweli wanataka Tonali. Kwa maoni yangu, tayari wana viungo wawili bora zaidi wa ukabaji duniani.”

Habari Zakanushwa Upande wa Newcastle

Licha ya uvumi huo kushika kasi, vyanzo vya ndani kutoka klabu ya Newcastle vimeanza kupunguza presha ya tetesi hizo. Lee Ryder, mwandishi mkuu wa habari za Newcastle United kutoka gazeti la Chronicle, amebainisha kuwa hakuna mazungumzo rasmi yaliyofanyika bado na klabu hiyo haipo tayari kumwachia mchezaji huyo kirahisi.

Ryder aliandika:

“Chini ya saa 24 baada ya filimbi ya mwisho dhidi ya Fulham, kuliibuka ripoti za mazungumzo kati ya Arsenal na wawakilishi wa Sandro Tonali. Jambo hili limekanushwa na vyanzo vya Arsenal, na Newcastle tayari wamejiandaa kwa majira ya joto yaliyojaa uvumi na tetesi. Hakuna mazungumzo yaliyofanyika hadi sasa, lakini Newcastle watamuuza mchezaji yeyote kwa masharti yao tu. Pia nimeambiwa kuwa kipaumbele cha Arsenal si kiungo kwa sasa.”